შინაგან საქმეთა სამინისტროს დაცვის პოლიციის დეპარტამენტის თბილისის მთავარი სამმართველოს ისანი-სამგორის დაცვის პოლიციის სამმართველოს თანამშრომელმა, გიორგი ლეკაშვილმა ტოკიოში, 15-25 აპრილს ჩატარებულ კენდოს საბრძოლო ხელოვნების (იაპონური ფარიკაობა) საერთაშორისო სემინარში მიიღო მონაწილეობა. სტუმრის რანგში სემინარზე მიწვეული იყო საქართველოს საგანგებო და სრულუფლებიანი ელჩი იაპონიაში, თეიმურაზ ლეჟავა.
დაცვის პოლიციის თანამშრომელი, გიორგი ლეკაშვილი კავკასიიდან ერთადერთი სპორტსმენი იყო, რომელიც კენდოს იაპონიის კლუბების ფედერაციის სპეციალური მოწვევით, სხვადასხვა ქვეყნის კენდოს ტიტულოვან სპორტსმენებთან ერთად, მაღალი დონის საერთაშორისო სემინარში მონაწილეობდა. სემინარის ფარგლებში, მონაწილე სპორტსმენებმა კენდოს ხელოვნებაში სპეციალური გადამზადებაც გაიარეს.
აღსანიშნავია, რომ გიორგი ლეკაშვილი საქართველოს კენდოს ეროვნული ფედერაციისა და თბილისის კენდოს კლუბ „სამურაის“ დამფუძნებელი და პრეზიდენტია. 2015 წლიდან იგი ევროპასა და აზიაში ჩატარებული არაერთი საერთაშორისო ტურნირის პრიზიორი და ჩემპიონია. ჩემპიონის მორიგი ტიტული გიორგი ლეკაშვილმა მიმდინარე წლის თებერვალში, საბერძნეთის ქალაქ სალონიკში, ვეტერანთა შორის კენდოს საბრძოლო ხელოვნების საერთაშორისო ტურნირის ინდივიდუალურ კატეგორიაში მოიპოვა.
